كلمات قصيدة الشاعر عمرو حسن قصيدة شتا


مُفتتح ..
ــــــــــــــــــ
" القهوة ، 
من كُتر الكتابة عنّها / باخت 
فيه حاجات زيادة مَدْحها لعنة 
يارب هَبنا قهوة تشبه حُزننا 
واوهبنا شخص أصمّ يسمعنا 
وادينا قلب نبوحله مايخونناش 
 وادينا حضن نروحله ، فيساعنا "

....................
صدرك شوارع ذكريات تايهين 
والحزن شاعر له هدوءه وحكمته
سألوا الكمان ياهل ترى بتحب مين ؟
ضاق - المكان - مافضلش غيرها ف رنِّته 
اتنين ف حرب وخرجوا الاتنين مقتولين 
 وحضنها هربت منه ،، رجعت حضنته !

مين اللي سلِّم للشتا المفتاح 
طعم الحاجات الدافية ف الليل والمطر 
زُهدك ف كل الهربانين من جنّتك 
البنت كانت حبِّتك ياعبيط 
حبِّتها ليه ساعة ماكانت كرهتك !؟
وازاي بتعمل من سجايرك بالونات 
بتسيبها تطلع للسما دخان 
البنت مشيّت وانت مُتّ عشان 
دخّنت نفسك ف الصحاب سرطان 
وعطشت من شُرب السما ف البحر 
والبحر من كتر الغرق عطشان 
فبلاش تفكّر كل ماء يرويك 
وبلاش تفكّر كل حضن شاريك 
فكّرت يومياً ف كل الناس 
 ونسيت تفكّر ف اللي فكّر فيك

في الليل مساحة اسمها " الأرشيف " 
كل الاغاني والصور والذكريات 
كل الحاجات بتطُل من ذكرى الحاجات 
ف الليل وكل المرتاحين نايمين 
هتمر جنبك لحظة تسوى ساعات 
أنا كتفي ممكن تلمسه يشوّك غياب 
أنا قلبي ممكن تعصره ينزل بنات 
لكن لسوء الحظ أو حُسنه 
مابقتش عارف أنسى دي بالذات 
وكإنها كوردات " عمر خيرت " 
ريحة الشوارع وقت فجرية 
كل البنات هي وهي البنات كلهم 
 وانت اللي بتروحلهم مابيطلعوش هي !

طب ايه ياعم الشتا ؟؟؟؟
أنا تحت عيني اتهرى من كتر ماحنّيت 
فكرّت فيها ضحكت .. ضحكت فجأة بكيت 
ليه الشوارع كلهم قاصدين 
يفكروني باللي مش فاضلين ؟
والقهوة كرسي الاعتراف بالذنب 
تشرب تقول كل اللي سابك مين 
ليه الشتا والبحر اتنين صحاب أنتيم 
طب ليه ف كل البلكونات حكايات 
فتّحت عيني جدي غمّض مات 
وكبرت بيتنا لم عفشه وهجّ
والدي ماحاجش بس شوفته " ياحاج " 
وايديه ف خدي ختم نسر كبير 
أمي اللي شيلت ف حضنها جناحات 
وبقيت ف طيبة كل حضن باطير 
وصحابي دفتر خدت صفحة ف مطلعه 
 منهم تلاتة " توأمين وضمير "

شكراً لإن الشتا / عرّانا مافضحناش 
شكراً لإن الذكريات مماتتش 
أكبر دليل عندك أنا 
أنا لسه اهو مانستش 
شكراً لـ بلّة طين ف ديل التوب 
شكراً لمطرة تبلّنا ننشف 
تعرف ياعم الشتا ولابلاش تعرف
في مثل هذا الوقت ف كل عام بيفوت 
باحيا واموت مرات وف كل ما احيا باموت 
وعملت منك ذكريات وحنين 
والقهوة سادة ووشها مظبوط 
وعملت عالم من خيال ألوان 
وعملت صورة بألف حس وصوت 
وفتحت صدرى للغياب شبابيك 
دخل الحمام عشش وصارله بيوت 
لا البنت راجعة ولا الكلام يكفيك 
ولا ضحكي باكي ولا العياط مبسوط .


شاركه على جوجل بلس

الكاتب هو غير معرف

مرحبا بك اي حد عاوز ينشر اي حاجه يكلمني ع الرقم ده واتس اي حاجه مدير الموقع عبدو شاكر 01151051498
    تعليقات بلوجر

0 التعليقات:

إرسال تعليق

التوصل واتس اب مع صحاب الموقع 0151051498